Պատերազմի մասին բոլոր կինոներն այսպես են սկսվում–

երեխաները բակում կռիվ-մռիվ են խաղում,

ու հայրերը՝ պատուհանից կախ,

միալար օրերի պղպջակները բերաններից կախ,

խաղաղության խոնջանքն աչքերից կախ,

թաքուն հերոս դառնալ են սովորում:

Որդիները հայրերին սխալ հեքիաթ են պատմում,

հայրերն առյուծի կաթ են խմում, մի գիշերում փոքրանում

ու գնում ուրիշ հայրերի հետ կռիվ-մռիվ խաղալու:

Պատերազմի մասին կինոների վերջում

պատուհանից կախ երեխաները

հայրերին տուն են կանչում: