Kull poeżija żarbuna.
Żarbuna iva żarbuna le, poeżija.

Hemm poeżiji li jeħduk iktar 'il bogħod
milli tieħdok żarbuna.
Hemm testi jtektku, versi jkaxkru,
poeżiji li jweġġgħulek is-saba' ta' saqajk,
u ġeneralment
wieħed m'għandux ixidd il-poeżiji ta' ħaddieħor.

Hemm ħajki sajfin,
poeżiji twal xitwija,
u siltiet tal-ħarifa li tħassarhom l-ewwel xita.

It-tfal jilbsu l-poeżiji tal-kbar,
iħawdu x-xellug mal-lemin,
tant li jidhru saħansitra iżgħar.
Il-kbar ma jorbtux sew il-lazz.

Il-poeżiji l-ġodda jżaqżqu,
l-antiki jibqgħu siekta.

Hemm poeżija għal meta taħrab,
hemm poeżija li twasslek id-dar,
hemm poeżija li trid tinżagħha qabel tidħol,
biex flokha xxidd poeżija totalment differenti,
ċatta, ratba, ritmika.

Biex tivverifika poeżija, m'hemmx bżonn taħraq il-ġilda,
kemm tieqaf f'nofs ta' triq u tgħid: “intlift”.

_Tradott minn Antoine Cassar