Հարգելի Քրիստոս,

հետաձգիր գալուստդ մեկ օրով,

որովհետև վաղը կիրակի է, ու պիտի քնեմ:

Սիրելի Աստված,

կանգնեցրու հրաբուխները,

երկրաշարժերը,

ջրհեղեղները,

մյուս աղմկոտ խաղերդ

ու աշխարհի վերջի պլաններդ

հետ գցիր մի օրով:

Պարոն քաղաքապետ,

արգելիր երթևեկությունն այս կողմերում

ու հայտարարիր լռության րոպե

իմ հիշատակին:

Թող Համասը չնետի ռումբեր,

ու Ալիևը չկրակի Արցախի վրա գոնե վաղը,

հարգելի Ալ-Քաիդա,

վերջացրու հակամարտությունն

արաբա-իսրայելական,

եվ տիկին-պարոններ,

զինադադար կնքեք այս գիշեր,

որովհետև վաղը կիրակի է, ու ես պիտի քնեմ:

Խնդրում եմ փակել Տոկիոյի բորսան,

մեծ քար խցկել Բաքու-Ջեյհան նավթամուղում,

կողպել BMW-ի գործարանը դրսից:

Հարգելի TV-ներ,

հայտարարեք պրոֆիլակտիկա,

ու թող Բոլիվուդը միայն երազներ նկարի

այս գիշեր:

Բարեկամ հեղափոխականներ,

հակահեղափոխականներ,

աջեր, ձախեր ու մեջտեղներ,

լքեք հրապարակն ու լռեք լռությամբ

գա-ղա-փա-րա-կան:

Եղբայր հավատացյալներ,

սիրեք ձեր մերձավորին գոնե այսօր,

երբ Հիպնոսի հետ եկել ու խնդրում եմ լռել:

Ու մի օրով

ջնջեք անունս մարդկանց ցուցակից,

անտուն շների ցուցակից,

Նոյի ցուցակից,

ընտրացուցակից,

անցյալ-ապագա հանցագործների,

բարեպաշտների,

քաղբանտարկյալների,

կամավորների,

կամազուրկների,

սպառողների,

հարկատուների,

թոշակառուների ցուցակից,

որովհետև վաղը կիրակի է, ու պիտի քնեմ:

Վերջապես

սև թուղթ ուղարկեք տնեցիներիս՝

չհիշվող երազի պես սև,

ու ինձ հարգելի բացակա դրեք,

որովհետև շաբաթ է,

կեսգիշեր,

կանգնած եմ օրվա եզրին

ու գցվում եմ ներքև:

Բարի գիշեր: